Една од активистките на „Шарената револуција“ и борец за човековите права, Ирена Цветковиќ, преку својот Фејсбук профил, порача дека е разочарана и изморена по долгогодишната борба против одредени политики.
Таа додаде дека „шарените“ се разочарани, и порача да не ја бараат повеќе за протести во иднина, поради нејзината премореност, барајќи подобри права и правда.
„Каде се Шарените сега?
Драги заинтересирани,
Шарените се тука, уморни и разочарани. Тука сме, во фиром, измрцварени, секој со својата траума. Се справуваме кој како може и знае.
10 години од нашите животи посветивме по улици, тротоари, плоштади. Протестиравме, се боревме и сонувавме за промени заедно. Губевме време, нерви, здравје, некои од нас и работа, пријатели, членови на семејство.
Се боревме за право на абортус, за човекови права, за универзитетска автономија, против полициска бруталност. Се боревме за слобода и правда, се боревме против режим. Бутнавме власт и добивме нова. Знаеме дека новата не е ни приближно добра како што се надевавме. Не барајте од нас и оваа битка да ја водиме.
Една власт симнавме низ протести. Немаме резервни животи за уште една деценија ист пат. Секој човек има сила за една голема битка. И толку.
Не ме барајте више за протести. Уморна сум, прегорена, разочарана. Од 10 години борба против режим заработив депресија, анксиозност и пристап до мир единствено преку апатија.
Вие сте на ред. Шарена заврши. Еве ви ги улиците, тротоарите, плоштадите. Борете се сега и за нас“, напиша Цветковиќ на својот профил.
