Во Босна и Херцеговина во изминатото деноноќие потврдени се релативно мал број на нови случаи на коронавирус – 726, но во исто време е поставен нов црн рекорд со дури 73 смртни случаи, објавија институтите за јавно здравје
Од вчера, тестирани се нешто повеќе од 2.100 примероци, а инфекцијата е потврдена кај 430 лица од Федерацијата БиХ и во 296 од Република Српска.
Бројот на новозаразени е значително помал од дневниот просек минатата недела, но бројот на тестирани примероци е исто така значително помал, што е вообичаена практика за време на викендите.
Во Федерацијата БиХ регистрирани се вкупно 47 смртни случаи, најголем број за еден ден во ентитетот и 26 во РС.
Вкупниот број на смртни случаи во БиХ од избувнувањето на епидемијата во март сега изнесува 1.972.
Властите во БиХ сè уште не најавија воведување на построги ограничувачки мерки од оние што веќе се во сила на кое било ниво. Во Федерацијата БиХ, забраната за движење во текот на ноќта сè уште важи, со исклучок на лицата кои поради работа не се дома, додека во РС нема такво ограничување.
