Тринаесет партии се обединија да го симнат Зврлевски, гласаше и Али Ахмети

Од 20 партии, колку што се застапени во парламентот, тринаесет гласале вчера за разрешување на јавниот обвинител, Марко Зврлевски. Пратениците од останатите седум, кои се дел од коалицијата на ВМРО-ДПМНЕ, ја напуштија салата и одбија да се произнесат откако недели наназад ја блокираа седницата со непрекинато барање на реплики и контрареплики.

Разрешувањето на Зврлевски доби по еден глас од ДПА и од БЕСА. БЕСА има пет пратеници во парламентот, од нив четворица не беа присутни, а својот глас “за” го даде само пратеникот, Африм Гаши.

Ретка прилика е во собранието да се види лидерот на ДУИ, Али Ахмети, кој исто така со својот пратенички глас вчера придонесе во разрешувањето на Зврлевски. Сите пратеници на владејачката коалиција СДСМ и ДУИ беа присутни и гласаа на седницата откако претходно им беа потребни неколку часа да се соберат и да формираат мнозинство поради што седницата беше одложена за попладневните часови.

Меѓу останатите  партии кои помогнаа во симнување на досегашниот шеф на републичкото јавно обвинителство се: ЛДП, ДОМ, НСДП, Алијанса за Албанците, Партијата за движење на Турците, Партијата за европска иднина, Партијата на обединети пензионери и граѓани на Македонија, Српската странка во Македонија и петмина независни пратеници.