Македонија и официјално нема да учествува на Евровизија 2025, објави Eurovisionfun, електронски медиум кој ги следи сите случувања поврзани со популарната музичка манифестација.
Како што пишува порталот, јавниот сервис МРТ нема планови за скоро враќање на Евровизија, откако во претходните години појасни дека причината за откажување на учеството е поради финансиската криза.
-Јавниот сервис МРТ го објави буџетот за 2025 година, но нема одобрени средства за учество на Евровизија. Земјата продолжува со учество на Детски Евросонг, натпревар за кој се потребни значително помали финансиски средства, известува Eurovisionfun.
Од балканските земји досега учество потврдиле Србија, Грција, Црна Гора, Албанија, Хрватска, Словенија… Бугарија и Романија се уште не биле сигурни дали ќе учествуваат на Евровизија 2025, која ќе се одржи во Базел.
Македонија за првпат учествуваше на Евровизија во 1998 година со песна на Владо Јаневски, а пак последен пат се појавивме на евровизиската сцена во 2022 година, со Андреа.
Вики Клинчарова