Републиканскиот претседателски кандидат Доналд Трамп изјави дека имал „многу добар“ телефонски разговор со украинскиот претседател Володимир Зеленски, повторувајќи дека ќе стави крај на војната во Украина дури и пред да ја преземе функцијата во јануари, доколку победи на изборите на 5 ноември.
Во објава на својата социјална мрежа Truth Social, Трамп рече дека како претседател ќе „донесе мир во светот и ќе стави крај на војната што чини многу животи“. Додаде дека Украина и Русија ќе можат да преговараат за мировен договор кој „ќе стави крај на насилството и ќе го отвори патот кон напредок“.
Трамп изјави дека Зеленски во петокот во телефонски разговор му честитал што станал републикански претседателски кандидат и дека го осудил атентатот врз него минатата сабота.
За време на разговорот со Трамп, Зеленски ја истакнал важноста од зачувување на двопартиската поддршка на САД за Украина, пренесува Укринформ.
„Разговарав со Доналд Трамп. Му честитав на републиканската номинација и го осудив страшниот обид за атентат во Пенсилванија. Му посакав сила и апсолутна безбедност во иднина“, напиша Зеленски на платформата „Икс“.
Зеленски ја истакна виталната важност на двопартиската и дводомната американска поддршка во заштитата на слободата и независноста на Украина.
Претседателот на Украина, исто така, изрази благодарност до САД што помогнаа да се зајакне способноста на Украина да се спротивстави на руските напади.
