Европа потроши повеќе за руска нафта и гас отколку за одбрана на Украина во војната против Русија, изјави американскиот претседател Доналд Трамп.
„Европа потроши повеќе пари за купување руска нафта и гас отколку за одбрана на Украина, многу повеќе“, рече Трамп на платформата Truth Social.
Земјите-членки на ЕУ купиле 21,9 милијарди евра руска нафта и гас во третата година од војната против Украина, според проценките на Центарот за истражување на енергија и чист воздух. Сумата е поголема од 18,7 милијарди евра што 27-члениот блок и ги додели на Украина како финансиска помош во 2024 година, покажаа податоците од Институтот за светска економија (IfW Kiel).
Трамп ја прекина воената помош за Украина по разговорите во Овалната соба со неговиот украински колега Володимир Зеленски, објавија медиумите во понеделникот, цитирајќи неименуван претставник на Белата куќа.
Тој сака брз договор за завршување на тригодишната војна, но Зеленски бара безбедносни гаранции.
Европските лидери се обидуваат да му го претстават сопствениот мировен план на Трамп, а ЕУ денеска го објави планот „Rearm Europe“, вреден 800 милијарди евра, за зголемување на трошоците за одбрана во текот на годините и обезбедување итна поддршка за Украина.