Најмалку 14 луѓе се спасени бидејќи рекордните врнежи поплавија делови од Торонто и оставија повеќе од 167.000 домови без струја.
„Environment Canada“ вчера објави дека во Торонто паднале речиси 100 милиметри дожд, со што го надмина дневниот рекорд на градот поставен во 1941 година, пишува Би-Би-Си.
„За три часа имавме 25 отсто повеќе дожд отколку што вообичаено би имало во цел јули со сите бури“, изјави метеорологот Дејв Филипс.
Поради невремето, неколку летови беа одложени или откажани од аеродромот Били Бишоп, на островите Торонто.
Главниот автопат кој минува покрај реката Дон е блокиран во двата правци поради поплави. Затворен е и автопатот Онтарио, а полицијата соопшти дека најверојатно ќе остане затворен уште еден ден.
Противпожарната служба во Торонто добила бројни повици од луѓе заглавени во лифтовите поради прекини на струја.
Управата за заштита на Торонто и регионот предупреди дека областите во близина на брегот, реките и потоците во градот се особено ранливи на поплави.
Градоначалничката на Торонто, Оливија Чоу, рече дека градот инвестира во напорите за чистење за да се осигура дека поплавите како оние во 2013 година нема да се повторат во иднина.
Таа година, најмалку 300.000 луѓе немаа струја во Торонто, а повеќе од 1.000 луѓе беа спасени од поплавен воз.
