Земјоделците кои протестираа против тековниот трговски спор со жито со Украина се судрија со полицијата во полскиот главен град Варшава. Земјоделците и нивните поддржувачи се собраа пред кабинетот на премиерот и се упатија кон зградата на парламентот, каде што ги пречека полицијата. Демонстрантите фрлаа камења и петарди кон полицијата, а полицијата одговори со бибер спреј, солзавец и шок бомби. Настанале спорадични тепачки, а полицијата со палки ги тепала земјоделците, пишува Раша тудеј.
Министерот за внатрешни работи Марчин Кјервински изјави дека во средата биле приведени 23 „провокатори“. Вкупно 13 полицајци се повредени, вклучително и еден полицаец кој претрпел „сериозна“ траума на главата, соопшти варшавската полиција на X.
На протестот учествуваа околу 30.000 луѓе, изјави портпаролката на градското собрание Моника Беут. Инспекторот Роберт Шумијата рече дека иако протестот првично бил „претежно мирен“, имало „групи луѓе кои сакале пресметка со полицијата“.
Земјоделците излегоа да ги осудат законите на ЕУ за „Зелен договор“ кои имаат за цел да ги ублажат ефектите од климатските промени.
„Ова се апсурдни прописи што земјоделците мора да ги почитуваат, што само ќе ја влоши ситуацијата и ќе ги зголеми трошоците за производство и цените на производите“, изјави еден од демонстрантите за Франс прес.
Полските земјоделци исто така ги блокираат влезните точки на границата со Украина, тврдејќи дека увозот на евтино жито и други производи ги убива нивните бизниси.