Светската здравствена организација (СЗО) објави дека минатата година во Европа се регистрирани 30 пати повеќе случаи на сипаници отколку во 2022 година и соопшти дека се потребни итни мерки за да се спречи натамошното ширење на болеста.
Во соопштението се наведува дека минатата година во Европа се потврдени повеќе од 30.000 случаи, наспроти 941 во 2022 година, а причината е помалиот број вакцинирани деца за време на пандемијата на Ковид.
„Во Европа видовме не само триесеткратно зголемување на бројот на заболени од сипаници, туку и речиси 21.000 хоспитализирани и пет смртни случаи, што е многу загрижувачко“, рече регионалниот директор на СЗО, Ханс Клуге.
Светската здравствена организација побара од сите земји во Европа брзо да реагираат на ширењето на мали сипаници и да обезбедат што е можно повеќе деца да ја примат вакцината.