СЗО: Поради ковид пандемијата 60 милиони деца во светот не се вакцинирани против сипаници

Светската здравствена организација (СЗО) повика да се вакцинираат децата кои не биле вакцинирани против мали сипаници за време на пандемијата Ковид-19, нагласувајќи дека болеста минатата година се појавила во повеќе од 50 земји.

Малите сипаници се многу заразна вирусна болест која предизвикува симптоми слични на грип и осип. Тоа понекогаш може да биде фатално, но може да се спречи со две дози од вакцината.

„Поради пандемијата „Ковид-19“, речиси 60 милиони деца ширум светот пропуштија да се вакцинираат“, рече Кејт О’Брајан, директорката за имунизација на СЗО, истакнувајќи дека е „навистина од клучна важност“ тоа да се надокнади.

На вакцинација против морбили вчера повика и Американскиот центар за контрола и превенција на болести.