Повеќе од 100 светски лидери ветија дека ќе му стават крај на уништувањето на шумите и ќе почнат да пошумуваат до 2030 година, во првиот голем договор на самитот за климата КОП26. Ветувањето содржи и над 19 милијарди долари јавни и приватни фондови.
Експертите го поздравија овој потег, но предупредија дека претходниот договор во 2014 година „воопшто не успеа да го забави уништувањето на шумите“ и дека обврските треба да се исполнуваат.
Сечењето на дрвјата придонесува за климатските промени бидејќи ги осиромашува шумите, кои апсорбираат огромни количества од загревачкиот гас ЦO2.
Британскиот премиер Борис Џонсон, кој е домаќин на глобалниот состанок во Глазгов, договорот од вторник го нарече „значен договор за заштита и обновување на шумите на Земјата“.
-Овие големи преполни екосистеми – овие катедрали на природата – се белите дробови на нашата планета, ќе рече тој подоцна на настанот КОП26, каде што светските лидери се состануваат за да разговараат за шумите и користењето на земјиштето, пренесува Би-би-си.
Двонеделниот самит во Глазгов се смета за клучен за климатските промени да се стават под контрола.
Земјите што велат дека ќе го потпишат ветувањето – вклучувајќи ги Канада, Бразил, Русија, Кина, Индонезија и Демократска Република Конго, САД и ОК, меѓу кои е и Македонија – покриваат околу 85% од шумите во светот.
И Бразил – каде што се исечени појаси тропска шума во Амазон – ќе биде меѓу потписниците во вторник.
Дел од средствата ќе бидат наменети за земјите во развој за обновување на оштетеното земјиште, справување со шумските пожари и поддршка на домородните заедници.
Владите на 28 земји, исто така, ќе се обврзат да го отстранат уништувањето на шумите од глобалната трговија со храна и други земјоделски производи како што се палминото масло, сојата и какаото.
Овие индустрии предизвикуваат губење на шумите со сечење дрвја за да се направи простор за пасење на животните или растење култури.
Повеќе од 30 од најголемите светски компании ќе се обврзат да ги прекинат инвестициите во активности поврзани со уништувањето на шумите.
Ќе се формира и фонд од 1,1 милијарди фунти за заштита на втората по големина тропска прашума во светот – во басенот на Конго.