На денешото судско рочиште за убиството на 14-годишната Вања Ѓорчевска и Панче Жежовски, сведочи Дејан Димовски, началник на единицата за насилен криминал во СВР Скопје. Тој во детали објаснуваше како била вршена потрагата по исчезнатата Вања.
-На 27 ноември минатата година добивме информација дека исчезнато е девојче. Во вечерните часови добив повик од колега да се вклучиме, бидејќи има изјави од родителите дека е можно да е киднапирано, грабнато. Веднаш ги повикав колегите и отидовме во полициската станица Центар, сведочеше началникот.
Тој посочи дека во стартот имало некои нелогичности.
-Ги повикавме родителите, директорката на училиштето, педагогот и класната. Ми беше нејасно зошто толку брзо Вања е пријавена за исчезната, во 8 часот и 2 минути. Но од разговорот ми се разјасни, бидејќи Вања требало да дојде на класен час за некој проблем што го имала со друго девојче за учебник, па класната затоа веднаш алармирала, но и имала навика да известува веднаш кога нема да се појави некој ученик, велеше сведокот.
Тој истакна дека повеќе комуницирал со мајката на Вања, а друг колега со таткото Александар.
-На колегата му било чудно што таткото Александра седел во кола не барал и постојано велел она е киднапирана, можно е да е убиена. Се правеа проверки и во Охрид. Во еден момент и реков на мајката, доколку е киднипирана, може и ќе е добро, во смисла дека ќе имаме трага, дека некој ќе не бара, ќе бара откуп, но немаше такво нешто.
Работевме на теории кои не водеа од разговорите од родителите. Ни кажаа дека Вања имала виртуелен дечко од Шведска, многу често комуницирале. Го пребаравме неговиот профил на фејсбук, имаше знаме од Исис. Па се насочивме кон него. Дали влегол во државата и на тоа изгубивме доста време, сведочеше началникот.
Кога излегле на терен заклучиле дека девојчето пешки не се движело, туку морала да излезе со возило.
-Излеговме и на терен да видиме каде живеело девојчето. Ги мапиравме сите камери. Но имаше еден мртов агол кој го покрива влезот на зградата кој не го фаќа камера. Од тоа заклучивме дека девојчето пешки не ја поминало улицата, зошто тогаш ќе влезело во видик на камера. Бевме убедени дека е замината со возило. Ги гледавме возилата и вршевме преглед на сите за да видиме нешто сомнително и да видиме девојче во возилото. Мислевме дека од некаква причина сакала сама да замине, да ги казни родителите. Но во возилата што поминуваа немаше девојче, велеше сведокот.
Тој посочи дека друга екипа работела за исчезнувањето на Панче, односно кога било пронајдено неговото изгорено возило.
-Бевме известени за најдено возило во Бразда. Тогаш немавме никаква поврзаност на двата случаја. Но бидејќи имаше и пријавено дека е исчезнат и велешанец, се пребаруваше теранот и се зема снимка од објект покрај патот. Го виделе ,,цитроенот”, но и еден пикап, но не можеа да се видат таблиците. Потоа бараа други камери за да видат нешто повеќе, велеше сведокот.
Тој раскажуваше и за комуникацијата што ја имал со таткото на Вања.
-Ми се јави таткото Александар. Имало некое сомнително возило, и ми прати слики. Не знаев зошто му било сомнително, а ми рече и некое комбе има до него, видете го и него. Тоа беа слики од камера од козметички салон кои ние веќе ги имавме. Повторно правевме проверка, се бараше возилото на снимките. Тогаш видовме дека тоа е запалениот ,,цитроен” на Панче. А ја добивме и таблицата на пикапот, односно на ,,рено кангу”. Колегите излегоа и на терен, и возилото го најдовме пред седиштето на ,,Десна”, а претседател е Љупчо Палевски Палчо. Тогаш баравме наредба за претрес. Но не ја добивме брзо, дека станува збор за политичка партија, па да не се сфатело како притисок. Кога ја добивме, внатре имаше тројца. Кешишов ни рече кај сте до сега, ве чекавме. Рече ја виделе колата и знаеле. Прашавме кај е Палевски, а Кешишев рече дека е за Белград, имал здравствени проблеми. Адвокатот пак што беше на претрес рече пред два дена тој го однел во Србија. Ние тогаш трагаме по Панче, немавме поврзаност со Вања, но ни стоеше фактот дека возилото поминало кај зграда на Вања, велеше сведокот.
Кешишов велел дека не знае ништо. Дека ретко излегувал.
-Но се гледаше дека нешто крие. Велеше дека му готвви на Палчо, тука спиел. Го прашавме со кого се дружи, и сомнуваше и некој Вељо од Велес. Излезе дека е Велибор Манев и живее на иста улица со Панче. Тогаш побаравме да се најде и да се изврши претрес. Кога му отишле на претрес, тој паднал во несвест. Тогаш го донесоа во Скопје, објаснуваше сведокот.
Во меѓувреме постојано правеле разговори со Кешишов.
-Постојано правевме разговори со Кешишов. Ноќта, му дадовме цигара, вода. Му велиме кажи што се случило. ,,Јас не сум човек. Јас сум, кажа лош израз штом сум учесник, не сум човек”. Се кршеше човекот. Уште не кажуваше, но зборуваше за некое место кај што одел со Палчо, во Бразда, сакал да гради нешто. Не однесе таму и му рековме кажи зошто дојдовме. Пак не носеше некаде, а колега ми кажа дека не носи на местото каде што е запален ,,цитроенот”. Му велевме да каже што понатака. Цело време му велел на колегата дека се плаши дека Палчо ќе го убие, имал многу луѓе во полиција. Тогаш ни рече ќе не носи кон ридот. Бараме нешто, некој леш, ама не знаев што бараме. По половина час, повторно му велевме да каже што и каде да бараме. Покажуваше со главата, не покажуваше со рака. Не зборува, пак покажува со главата. Покажуваше кон перници, мушама, ги тргнавме и видовме земја. Почнавме да копаме и осетивме дека е ровка земјата и дека пропаѓа. Кешишов не сакаше ниту да гледа, се сврте со грбот. Дојде колегата и ни кажа дека Кешишов му рекол дека тука е маленкото, девојчето Вања. Го викнавме да копа и тој со нас. Дојде зема стап и копаше. Потоа пак се помести. Кога дојдовме до телото шок, солзи ни дојдоа на очи. Ги известивме сите. Кешишев ни кажа дека со нив бил и Боре каратистот од Велес, по што се бараше приведување, рече началникот.
Тој сведочеше и за шокот кога го нашле девојчето.
-Девојчето беше како живо. Рацете и беа врзани позади и нозете со стеги. И на устата имаше лента. Други знаци на насилство не видовме, рече началникот.
Тој додаде дека Кешишов рекол дека работеле по насоките на Палчо, се било во главата на Палевски.
За овие грозоморни убиства обвинителството ги обвинува Љупчо Палевски, Боре Видевски, Велибор Манев и Влатко Кешишов, како и таткото на девојчето, Александар Ѓорчевски. Сите на првото рочиште од судењето се изјаснија дека не се чувствуваат виновни.
Судењето го води судијата Ивица Стефановски, а застапник на обвинението е обвинителката Жаклина Крстевска.
Валентина Вурмо
