Високиот суд на ЕУ соопшти дека следниот месец ќе ја разгледа тужбата за објавувањето на приватни СМС пораки што шефицата на Европската комисија Урсула фон дер Лајен ги испратила за да преговара за купување вакцини против Ковид-19. Случајот се фокусира на пораките што Фон дер Лајен ги размени во екот на пандемијата со Алберт Бурла, главен извршен директор на Фајзер, за да помогне да се организираат големи набавки на вакцини во ЕУ.
Размената беше откриена од Њујорк Тајмс во 2021 година.
Содржината на пораките никогаш не беше објавена, а американскиот весник минатата година ја тужеше Европската комисија за необјавување на пораките и покрај барањето за слобода на информации.
Портпаролката на Судот на правдата на Европската унија со седиште во Луксембург денеска потврди дека жалбата на весникот ќе биде разгледана на 15 ноември.
