„Во моментов се обработуваат три лиценци за менувачници на криптовалути во Србија. Од 23-ти декември, вкупно четири издавачи на токени платија за барањето за лиценца, рече српскиот министер за финансии Синиша Мали пред српскиот парламент.
Тој исто така коментира дека во следните неколку години Србија ќе биде првата земја во Европа што официјално ќе издава крипто-лиценци.
-Ова е многу важно за нас, додаде Мали, потсетувајќи дека земјата била една од првите земји што ја регулираше областа.
Крипто-пазарот се развива бавно, но сигурно, велат српските финансиски аналитичари. Земјата интензивно работи и на стратегија за раст и развој на Белградската берза. Оттаму веќе се подготвуваат да создадат алатка за поддршка на српските финансиски пазари и да развијат платформа за тргување со дигитални токени. Се очекува да биде воведена следната година.
Според последните проценки, повеќе од 200.000 луѓе во Србија поседуваат некаков облик на криптовалута, а интересот за поседување виртуелни пари во земјата расте. Најголем интерес има за биткоинот, а финансиските експерти велат дека зголемениот интерес се должи на фактот што криптовалутите веќе се признати со српските закони.
Според Законот за дигитална сопственост, кој стапи на сила на 29 јуни годинава, виртуелните пари се препознаваат како виртуелна сопственост, односно како записи за дигитална вредност што може да се купуваат, продаваат, разменуваат или префрлаат дигитално.
Марко Живковиќ, маркетинг директор во „ECD”, неодамна коментираше дека „законот ја става Србија на мапата на земји кои ги признаваат криптовалутите како составен дел не само на иднината, туку и на сегашноста“.
Србите сега можат легално да купуваат и продаваат криптовалути преку лиценцирани менувачници. Во моментов се чека официјалната дозвола од Народната банка на Србија, за да можат и луѓето и бизнисите подобро да продаваат одредени услуги и производи користејќи биткоин или друга криптовалута.
Од моментот кога менувачниците за криптовалути ќе ја добијат предметната дозвола, ќе може да се купи речиси секој производ во земјата преку виртуелни пари, како и да се плати речиси секоја услуга.