Министерот за внатрешни работи Оливер Спасовски денеска во Кавадарци заедно со дел од раководството на МВР оствари средба со раководството на Регионалниот центар за гранични работи ЈУГ за да се сумираат резултатите од сработеното, но и да се изврши преглед со цел утврдување на приоритетите за идната година.
„Генерално, овој Регионален центар годинава бележи зголемување од 43% на откриените кривични дела, постапувајќи по 25 различни основи од Кривичниот законик. Најзначајното зголемување е кај кривичните дела фалсификување исправи, и тоа за 114%, давање поткуп за 300%‚ потоа кражба, давање на лажни докази и сл. Што се однесува до прекуграничниот криминал, кој во најголем дел е откриен на ГП Дојран, ГП Богордица и ПС Михајлово, откриените фалсификувани документи бележат зголемување од 39%, за 20 пати е евидентирано зголемување на откриениот криминал со моторни возила, додека за 8 пати на откриениот криминал со цигари”, истакна министерот Спасовски.
„Во однос на обидите за илегални преминувања, иако најголемиот притисок години наназад е токму на границата на Република Северна Македонија со Република Грција, годинава имаме за 50% намалување на бројот на обидите за илегално преминување на границата, односно отворање на нови рути во соседните држави. Тоа се должи на зајакнатите мерки и поефикасната контрола како на самата гранична линија, така и преку работењето на пунктови во внатрешноста и, секако, вклученоста на припадниците на Фронтекс. Бројот на откриени случаи на криумчарење на мигранти е сличен со минатата година, но ако го земеме предвид фактот дека бројот на мигранти во 2023 е намален за половина од лани, тоа говори за поголема ефикасност при откривањето на овие кривични дела во 2023 година. Во оваа прилика не можам, а да не го споменам зголемувањето на протокот на патници во однос на минатата година, и тоа за 25%, односно јужната граница во овие 11 месеци ја поминале речиси 5,8 милиони патници, а најфреквентен е ГП Богородица, каде зголемувањето изнесува цели 30%. Во однос на другите активности по споменатите оперативни акции, РЦ Југ бележи зголемување за 110% на откриениот криминал со огревни дрва, а за 6 пати се зголемени откриените случаи на шверц со наркотици”, рече Спасовски.