Соживотот носечка парола на прославата за Илинден

Носечката парола на сите активности организирани од државата по повод чествувањето на Денот на Републиката во својата основа ја носи идејата на соживотот. Лајтмотивот, како што велат од Владата, е инспириран од Крушевскиот манифест.

„Наша Македонија – без разлика на вера, етничка припадност, пол и убедување. Бидејќи од дедо – прадедо си живееме како браќа и сестри на оваа земја! За право, за слобода и за човечки живот“, под овие зборови државните функционери денеска ќе се поклонат пред симболите на празникот.

Централниот настан за одбележување на годишнината од Илинденското востание ќе биде на Мечкин Камен во Крушево. На пладне ќе отпочне големиот Народен собир, а програмата ќе ја отвори пристигнувањето и поздравот на коњаницата.