„Состојбата во северно Косово е мошне кревка“

Шефот на Мисијата на Европската унија за владеење на правото во Косово – ЕУЛЕКС, Ларс Гунар Вигемарк ја оцени безбедносната состојба во северно Косово, создадена по напуштањето на институциите од страна на косовските Срби, како „мошне кревка“, јави дописникот на МИА од Приштина.

По денешната посета на областа во која живее мнозинско српско население, Вигемарк на својот Твитер напиша дека тамошното население е исплашено од можниот развој на настаните по најавеното спроведување, од 21 ноември, на одлуката на Владата во Приштина за казнување на тие што нема да ги променат регистерските таблички издадени од Србија со таблички со ознаката РКС, односно Република Косово.