Конфликтот меѓу Русија и Украина влезе во 1.007 ден.
Во текот на вчерашниот ден Русија изврши силни напади врз два украински града Харков и Одеса, во кои беа повредени голем број цивили.
Десетици руски беспилотни летала кои го нападнаа Киев во текот на ноќта се откриени и уништени од воздушната одбрана, соопшти воената управа на главниот град на Украина.
Руски беспилотни летала дошле во главниот град на Украина од различни правци во бранови, а предупредувањето за воздушен напад траело повеќе од пет часа, соопшти воената управа на градот Киев, пренесува Укринформ.
Засега нема извештаи за штети или жртви, а точниот број на соборени руски беспилотни летала се очекува да го соопшти украинското Министерство за одбрана, пишува порталот.
Руските системи за противвоздушна одбрана неутрализирале повеќе од триесетина украински беспилотни летала над седум региони на Русија во текот на ноќта, соопшти Министерството за одбрана.
Дежурните системи за противвоздушна одбрана уништија и пресретнаа 39 украински беспилотни летала“, се вели во соопштението, а пренесува РИА Новости.
Се наведува дека 24 беспилотни летала биле соборени над Ростовската област, пет над територијата Брјанск, три над Белгородската област и Курската област, еден над Ојол и Воронежската област и два над Крим.