Со голем Аеромитинг во сабота на 16 септември, на спортскиот аеродромот Стенковец кај Скопје, ќе се одбележи јубилејот – 100 години Македонска авијација за чиј почеток се смета основањето на Аероклубот Скопје во далечната 1923 година.
За настанот на кој ќе присуствуваат владини претставници и гости од земјата и регионот, подготвена е богата програма во која ќе учествуваат над 30 различни воздухоплови од земјава и странство како и падобранци од нашата земја и од пријатели на клубот од целиот регион. Аеродромските врати за посетители ќе бидат отворени во 9 часот, а официјалната програма почнува во 11 часот.
Посетителите ќе уживаат во акробатско летање со авиони, прелети во група и низок прелет на патнички авион. Падобранците ќе го развеат најголемото државно знаме досега скокнато, а едриличарите ќе покажат акробации од кој застанува здив. Во програмата предвидено е да има акробации кои се стандардни за аеромитинзи, а свое учество ќе земат и хероите на летните пожари, трите Air Tractor AT-802A Fire Boss на Дирекцијата за заштита и спасување кои ќе летаат во формација, потоа владиниот авион од типот Лирџет 60, полициските хеликоптери и авионот на воените сили Mi-17, а во низок лет ќе лета патничкиот авион Ербас А320 на авиокомпанијата Визер.
Специјални гости ќе бидат авиони од воздушните сили на Србија, Италија и Грција. Посебна атракција ќе приредат двата суперсонични пресретнувачи MIG-29 на Српското воено воздухопловство кои исто така ќе биде дел од големиот Аеромитинг.
На аеромитингот ќе биде изложена и единствениот Македонски воздухоплов дизајниран и произведен од членови на Аероклубот Илинденка. Таа е светиот грал на Македонското воздухопловство. Во соработка со Министерството за одбрана на Република Северна Македонија успеавме привремено да ја донесеме Илинденката за да може да ја претставиме на посетителите и јавноста.
Влезот на аеромитингот е слободен и бесплатен. Секој може да влезе и да излезе кога сака. Посетителите треба да се подготват како за пикник. Пожелно е да носат барем ќебенце, ако не камперски столчиња и други помагала. Колку порано дојдат – толку подобро место ќе си фатат.
Јадење и пиење посетителите може да си носат, но ако сакаат може и да си купат, ќе има штандови со јадење и пиење.
Паркинг-местата се ограничени. На посетителите од Скопје им препорачуваме наместо со автомобил, да дојдат на Стенковец со бесплатните автобуси кои тргнуваат во 8:30 од 5 локации во Скопје: Автокоманда кај ЈСП, Транспортен центар, Ѓорче Петров кај пазарот на вториот кружен тек, Бутел кај Еделпром и салата Борис Трајковски. Автобусите ќе возат во двата правци до 19 часот.
Клубот измина долг пат од своето основање и низ него поминале над 3.000 воздухопловни ентузијасти, пилоти, едриличари, падобранци и механичари. Низ овие години тој изградил силна репутација за воздухопловна безбедност, образование и обука, и обезбеди можности за младите луѓе да продолжат со кариерата во воздухопловството.