Обвинителството отвори истрага за скопски сметководител, кој е осомничен за злоупотреба на речиси 11 милиони денари, односно парите на нотарот, од кого бил ангажиран, ги префрлил на сметката на својата сопруга, по што ги извадил.
-Осомничениот во периодот од 28.04.2016 година до 28.11.2019 година, како сметководител за водење на сметководството на нотарска канцеларија, со намера за себе да присвои противправна имотна корист присвоил пари кои му биле доверени во службата во значителна вредност од 10.913.195 денари.
Тој неовластено пополнил и потпишал налози за пренос на парични средства од банкарската сметка на нотарот, на банкарска сметка на неговата сопруга. Потоа, осомничениот како овластен потписник на банкарската сметка на неговата сопруга ги подигнал во готово паричните средства, се вели во соопштението на Обвинителството.
Оттаму додаваат дека поднеле предлог за одредување на мерки на претпазливост за осомничениот сметководител.
-Поднесен е предлог за определување на мерки на претпазливост за осомничениот и тоа: забрана за напуштање на живеалиште односно престојувалиште, обврска на осомничениот да се јавува повремено на одредено службено лице и привремено одземање на патна исправа за преминување на државна граница.
Предложените мерки се во насока на обезбедување на непречено одвивање на кривичната постапка, а поради постоење опасност од бегство на осомничениот и особени околности кои го оправдуваат стравот дека осомничениот ќе го повтори кривичното дело, стои во соопштението.
