Скопје се гуши во смог – четврти град во светот по загаден воздух

Скопје утрово се најде на четвртото место на листата најзагадени градови во светот, со индекс на загаденост од 187, покажаа податоците од платформата IQAir. Пред Скопје се само Дака, Лахор и Делхи.

Загриженоста расте кај граѓаните, кои се жалат на отежнато дишење поради смогот и загадениот воздух кои се постојан проблем во зимските месеци. Густата магла и високиот процент на PM2.5 честички се проблем особено за хронично болните лица, децата и постарите.

Премиерот Христијан Мицкоски вчера кажа дека проблемот не може веднаш да се реши, дека потребно е да се изградат гасни централи и да се намали употребата на фосилни горива, а за тоа се потребни неколку години.