Хрватскиот претседател, Зоран Милановиќ, учествуваше на вонредниот состанок на шефовите на држави и влади на НАТО во Брисел.
-Се спомнуваше регионот, БиХ како земја која наводно е загрозена, но никој не ги спомена Србија и Косово. Србија има избори за неколку дена и имам впечаток дека долго време се во некоја идентитетска криза, па тешко сфаќаат дека за Русите се само фуснота – рече Милановиќ по средбата.
Милановиќ кажа дека засега не е планирано хрватски војници да заминат во Унгарија и воедно истакна дека некои од лидерите не ни знаеле за падот на дрон во Хрватска.
-Некои не знаеја, тоа беше очигледно од нивните изрази. Пораката беше дека тоа се случило и дека дронот летал извесно време над територијата на НАТО и паднал. Без вперување со прст кон никого. Зборував и со премиерот Орбан. Тоа се случи и се надеваме дека нема да се повтори. Но тоа и не е работа на НАТО, на тоа требало да реагира првата држава, а тоа е Унгарија – рече хрватскиот претседател.