Силен земјотрес на северот на Италија, локалното население во паника

Земјотрес со јачина од 4,8 степени според Рихтеровата скала ги погоди рано денеска делови од Тоскана, Италија, соопштија геолозите и пожарникарите, без извештаи за материјална штета или повредени.

Според италијанскиот институт за геофизика и вулканологија, епицентарот бил во близина на Маради, североисточно од Фиренца, а се случил во 5:10 часот по неколку помали последователни потреси.

Институтот изјави дека областа се смета за високоризична за земјотреси, особено потсетувајќи на земјотресот во 1919 година што го погоди Муџело, кој беше еден од најсилните во Италија во 20 век.

Италијанските пожарникари соопштија дека примиле неколку повици од загрижените локални жители, но дека засега нема информации за штети или повредени.