Кинескиот претседател Си Џинпинг денеска му честиташе на Масуд Пезешкијан за неговата победа во вториот круг од претседателските избори во Иран, објавија државните медиуми.
-Му придавам големо значење на развојот на односите меѓу Кина и Иран и подготвен сум да работам со претседателот на промовирањето на сеопфатното стратешко партнерство меѓу Кина и Иран, рече Си, пренесен од Ксинхуа.
Си додаде дека Кина и Иран имаат долга историја на пријателски врски и билатерални односи кои траат повеќе од половина век.
Во контекст на сложената регионална и меѓународна ситуација, Си посочи дека Кина и Иран секогаш меѓусебно се поддржувале.
Кина е близок партнер на Иран, негов најголем трговски партнер и главен купувач на неговата нафта под санкции.
Пезешкијан ќе го наследи Ебрахим Раиси, кој во мај загина во хеликоптерска несреќа на северозападот на Иран.