Бројот на загинати во нападот на болницата Ал Ахли во Појасот Газа најверојатно ќе биде меѓу 100 и 300, но таа проценка може да се промени, се вели во декласифициран извештај на американското разузнавање. Освен бројот на жртвите, во документот се споменува и чија е вината и се наведува дека се смета дека „Израел не е одговорен“.
Официјални лица во Газа претходно рекоа дека најмалку 471 лице загинале во израелски воздушен напад врз таа болница, а Израел негираше вмешаност во експлозијата и го обвини неуспешното лансирање ракета од страна на палестинскиот исламски џихад.
„Ние веруваме дека Израел не е одговорен“, се вели во некласифицираниот извештај на американското разузнавање.
Инаку, документот до АФП го проследил неименуван извор од Капитол Хил, пишува Гардијан. Деталите ги објави и Њујорк Тајмс.
„Сè уште го проценуваме веројатниот број на жртви и нашата проценка може да се промени, но оваа бројка сè уште ја одразува неверојатната загуба на животи. САД сериозно ја сфаќаат смртта на сите цивили и интензивно работат на решавање на хуманитарната криза во Газа“, се вели во документот.
Хамас ја обвини експлозијата на израелски воздушен напад, додека израелската војска ја обвини ракетата истрелана од друга палестинска милитантна група Исламски џихад, која исто така ја отфрли одговорноста.
Според документот на американското разузнавање, „Израел веројатно не ја бомбардирал (болницата) во Појасот Газа“, а САД продолжуваат да „работат за да потврдат дали експлозијата била резултат на неуспешна ракета на PIJ (палестински исламски џихад)”.
Во документот се наведува и дека имало „само лесни структурни оштетувања на болницата“, без забележлива штета на главната болничка зграда и без ударни кратери“, пренесува Гардијан.
Дописниците на АФП на местото на настанот видоа десетици тела додека медицинските лица и цивилите ги извлекуваа телата завиткани во бела ткаенина, ќебиња и црни пластични кеси. Во дворот на болницата можеа да се забележат дамки од крв и запалени автомобили.
Фотографиите од болницата по експлозијата што ја објави групата Максар покажуваат дека зградите на болницата останале главно недопрени.
Експлозијата во болницата се случи во вторникот околу 19 часот по локално време. Снимката од 20 секунди што кружи на социјалните мрежи во која се тврди дека го покажува нападот е првиот значаен визуелен доказ што се појави по настанот.
На него се слуша свиреж на проектил кој доаѓа, по што се гледа експлозија и огромен пожар, јавува Би-Би-Си.
Снимките во живо од медиумската мрежа Ал Џезира, емитувани во 18:59 часот по локално време, покажаа силна светлина што се издигнува кон небото над Газа. Можно е да е од ракета, која се чини дека експлодирала или се распаднала.
На видеото, блицот е далеку, проследен со многу поголема експлозија поблиску до камерата. Други снимки што се појавија на социјалните мрежи се чини дека ја прикажуваат истата експлозија од различни агли и од различни далечини.
„Се консултиравме со експерти за да утврдиме дали достапните докази – меѓу нив и големината на експлозијата и звуците слушнати пред неа – може да се искористат за да се утврди причината. Засега, наодите се нецелосни“, пишува Би-Би-Си.
