Германскиот канцелар Олаф Шолц денеска на отворањето на Берлинскиот процес изјави дека ЕУ е комплетна само со Западен Балкан како нејзин дел.
Тој изјави дека сите знаат дека регионот на Западен Балкан се уште е обликуван од минатите конфликти и дека е време да се надминат и регионот да се сврти кон иднината, пренесе РТС.
„Затоа сакам да им порачам на нашите пријатели од Белград и Приштина – не дозволувајте минатото да ве одвлекува од патот кон мирна и просперитетна иднина. Сè уште сум убеден дека таа иднина е во ЕУ и дека постои само еден начин да се стигне до таму – целосно спроведување на договорите што веќе ги постигнавте“, рече Шолц.
Тој посочи дека се посветени на решавање на билатералните прашања во духот на соработката и мирните средства и дека тоа е она што го застапува Берлинскиот процес.
Истовремено, тој го пофали деблокирањето на договорот за слободна трговија ЦЕФТА бидејќи, како што рече, овозможува активирање на неколку други договори, како што се договорите за работни дозволи и рутите за е-трговија.
Наведувајќи дека деблокирањето на договорот ЦЕФТА не е единствената одлука што ќе биде донесена денеска, Шолц рече дека ќе бидат потпишани два документи кои ќе им го олеснат секојдневниот живот на луѓето.
„Првиот, нов акциски план за заеднички регионален пазар, фундаментален документ за натамошно продлабочување на економската интеграција. Покривајќи ги и социјалните и работните аспекти на соработката и мобилноста, ова ќе ја направи прекуграничната работа помалку комплицирана и значително ќе ве приближи до стандардот на ЕУ“, рече Шолц.
Претседателката на Европската комисија, Урсула фон дер Лајен на социјалната мрежа Х изјави дека за време на самитот ќе разговараат за досегашните постигнувања, но и за иднината во која сите шест партнери од Западен Балкан се дел од ЕУ.
Фон дер Лајен рече дека затоа е добро да се биде во Берлин со партнери од Западен Балкан – „да се погледне назад на нашите достигнувања, но особено да се гледа напред“ кон иднината во која сите шест партнери од Западен Балкан се дел од нашата Унија“.
Премиерот Христијан Мицкоски, заедно со министерот за надворешни работи и трговија Тимчо Муцунски, министерот за внатрешни работи Панче Тошковски и министерот за европски прашања Орхан Муртезани, денес и утре се во посета на Берлин, Сојузна Република Германија каде ќе се одржи состанокот на шефови на Влади на земјите од Западен Балкан во рамки на Берлинскиот процес.
