Случајот „Рекет“ и сите истраги поврзани со него покажаа дека навистина никој не е над законот, вели вицепремиерката и министерка за одбрана Радмила Шекеринска во интервју за Радио Слободна Европа, додавајќи дека тоа е така затоа што веќе никој на го крева телефонот на судии и на обвинители за да им каже што да прават.
Таа оценува дека барањата на ВМРО-ДПМНЕ никогаш не биле насочени кон правда, туку кон лаги, дезинформации и бегство од одговорност.
– Приказната или нивните реакции врзани за овој случај е ишкање на мувата за да не видиме колку државата се променила во овие две и пол години. Јас ќе ви кажам еден обичен пример за кој информираа невладините организации коишто ги следат различните предмети во судството. Ако ги анализирате предметите со таканаречените бомби ќе видите дека првиот случај за кој требаше една година и половина за да влезе во судска постапка веќе три години е заглавен во судски лавиринти. И овие денови врз основа на она што се случува во случајот „ТНТ“, гледаме како тоа го прават. Прво се бега од рочишта, потоа се бара одлагање на рочиштата, потоа се менуваат адвокати, па луѓето коишто зборуваа против употребата на албански јазик, наеднаш ангажираат адвокати кои бараат сè да им се преведе на албански јазик, додава министерката за одбрана.
Таа потенцира дека според анализите на една невладина организација, 60 проценти од сите рочишта врзани за бомбите се одлагаат, па затоа четири години подоцна сè уште овие предмети тапкаат во место без крај.
– Е сега ако го споредите тоа со процесот којшто се случуваше, а врзан со „Рекет“, ќе видите дека разликата е огромна. За нецели шест месеци имавме од наоди во јавност, истрага, предистрага, обвинителен акт, неколкумина во притвор и рочишта коишто се случуваат по неколку во неделата. Знаете зошто? Заради тоа што никој од Владата, од владејачкото мнозинство или од политичарите не диктира веќе пресуди. Не го креваме веќе телефонот на судии и на обвинители да им кажеме што да прават. И пораката од почетокот на владата беше иста – За секој мора да важи законот. Никој не е над законот и случајот „Рекет“ и сите истраги поврзани со тоа покажаа дека навистина никој не е над законот. Она што го прави ВМРО-ДПМНЕ е да не натера да не гледаме како сега и во функција на опозиција се трудат да ја опструираат правдата, наведува Шекеринска.
Министерската за одбрана потенцира дека Јавното обвинителство сега може да истружува сè и во ниеден момент никој од власта не се обидел да го спречи тоа.
– Инаку, ако земеме список кој сè бил не само кај криминалецот, туку и кај бегалецот Груевски, ВМРО-ДПМНЕ треба да ја затвори партијата, вели Шекеринска во интервјуто за Радио Слободна Европа.