Генералниот секретар на ОН Антонио Гутереш изрази жалење поради неуспехот на Советот за безбедност на ОН да одговори адекватно на војната меѓу Израел и Хамас во Газа и руската инвазија на Украина, нагласувајќи дека конфликтите „можеби фатално“ го поткопале авторитетот на Советот. Говорејќи на отворањето на Советот за човекови права на ОН во Женева, Гутереш рече дека Советот за безбедност често се наоѓа во ќорсокак и „не може да реагира на најважните прашања за мир и безбедност на нашето време“.
„На Советот му е потребна сериозна реформа на неговиот состав и методи на работа“, додаде тој. Минатата недела, Соединетите Држави ставија вето на нацрт-резолуцијата на Советот за безбедност со која се повикува на итен хуманитарен прекин на огнот во израелската офанзива врз Газа.
Тоа беше трето американско вето на нацрт-резолуцијата од почетокот на актуелниот конфликт на 7 октомври. Околу 1,5 милиони жители на Газа се сместени во шатори и други привремени засолништа во градот Рафа на границата со Египет, а повеќето од нив ги напуштиле своите домови на северот на земјата бегајќи од израелската офанзива.
Гутереш, кој го опиша Рафах како центар на хуманитарните операции во палестинската енклава, рече дека целосниот израелски напад таму ќе има катастрофални последици.
„Целосна израелска офанзива на градот не само што би била застрашувачка за повеќе од еден милион палестински цивили кои се засолниле таму, туку би ја ставила последната шајка во ковчегот на нашите програми за помош“, рече тој.