Северна Кореја лансира балистичка ракета, велат од Јужна Кореја

Хиперсонична ракета за која постои сомневање дека била лансирана од Северна Кореја експлодирала во средината на летот, соопшти војската на Јужна Кореја.

Генералштабот на Јужна Кореја соопшти дека Северна Кореја лансирала балистичка ракета од главниот град околу 5:30 часот, по локално време.

Во соопштението се додава дека проектилот бил истрелан кон источните води на Северна Кореја, но дека лансирањето завршило неуспешно. Воените власти соопштија дека проектилот експлодирал додека летал над вода во близина на севернокорејскиот крајбрежен град Вонсан, пренесе АП.

Според нивните изјави, фрагменти од проектилот се распрснале во водата, на околу 250 километри од местото на лансирање. Засега нема извештаи за штети.