Францускиот предлог ќе оди директно на пленарна седница, но сѐ уште не знае кога точно ќе најде пред пратениците. По координацијата на пратеничките групи во Собрание, Кабинетот на Џафери соопшти дека не постои деловничка одбредба која му овозможува на претседателот да го врати францускиот предлог до Владата.
-Согласно член 185 од Деловникот на Собранието, тој ја доставува Информацијата до пратениците во форма во која што е добиена и нема надлежност да навлегува во нејзината содржина и нема деловничка одредба која што му овозможува да ја врати информацијата до предлагачот.
Според процедурата, Информацијата која што е на дневен ред на пленарна седница се усвојува со донесување на Заклучоци по однос на Информацијата, додаде Џафери.
Вицепремиерот за европски прашања Бојан Маричиќ, кој присуствуваше на координацијата, информира дека ќе ги пренесе ставовите на опозицијата и информациите од оваа средба до Владата за потребата да се дополни Информацијата со материјалите кои што се јавно достапни и во неа се наведени како референца.
На денешната редовна координација свикана од претседателот на Собранието, Џафери, присуствуваа и потпретседателот на Собранието, Горан Мисовски, координаторите на пратеничките групи на ВМРО-ДПМНЕ, Никола Мицевски, на СДСМ, Јован Митревски, на ДУИ, Арбер Адеми и на Алијанса на Албанците, Илире Даути, како и претставниците на политичките партии БЕСА, Алтернатива и Левица.
Инаку, за денеска во Собранието е закажана пленарна седница со една точка на дневен ред – Ребаланс на Буџетот, за која што расправата ќе трае до пет дена.