Сопругата на израелскиот премиер Сара Нетанјаху испратила писмо до Џил Бајден во кое ја повикува првата дама на САД „да работи за итно ослободување на израелските заложници кои ги држел Хамас во Газа“, пренесуваат странските медиуми. .
„Ви пишувам не само како сопруга на Биби, туку пред се како мајка, Вам како прва дама и мајка“, стои во писмото на Нетанјаху.
Таа наведува дека во изминатиот месец 32 деца биле „киднапирани и насилно одвоени од нивните родители“ во Газа.
„Овие деца беа сведоци и на бруталните убиства на нивните семејства на тој страшен 7 октомври“, вели таа.
Во писмото таа го спомна и случајот со бремена жена која Хамас ја киднапираше за време на нападот на Израел, а која во меѓувреме се породи во заробеништво.
„Можете само да замислите, како и јас, низ што поминува оваа млада мајка додека е заробена со новороденче“, рече Нетанјаху.
Потоа, како што вели, Хамас однел во заробеништво и 10-месечно бебе кое било „киднапирано уште пред да научи да оди или да зборува“.
„Овој кошмар кој започна пред повеќе од еден месец мора да заврши. На овие деца им е потребна нашата помош“, заклучи сопругата на израелскиот премиер, предупредувајќи дека е неопходно да се побара ослободување на заложниците, но и да се побара што поскоро да ги посети Црвениот крст.