Во сабота, на втори ноември со почеток во 12 часот ќе се одржи официјалното отворање на новиот фудбалски терен на ФК Аеродром.
Игралиштето е лоцирано во непосредна близина на училиштето „Александар Македонски“ во Ново Лисиче. Покрај новиот фудбалски терен, на настанот ќе биде промовирано и новото лого на ФК Аеродром и ќе биде прикажана новата маскота на клубот, наречена Дромко.
На отворањето ќе присуствува министерот за спорт, Борко Ристовски, градоначалникот на Општина Аеродром, Дејан Митевски, како музичка поддршка е ангажиран Диџеј Мац, а пак химната ќе ја изведе Сара Мејс.
-По две години посветена работа, овој современ терен е подготвен да ги прими сите љубители на фудбалот и спортската рекреација.
Слоганот на настанот, #СекогашСпремни, го одразува духот на ФК Аеродром – подготвени за нови предизвици, спортски победи и заеднички успеси. Двочасовниот настан ќе биде исполнет со забавни активности за сите возрасти, меѓу кои специјален натпревар со познати личности и возбудлив детски турнир, каде што младите фудбалери ќе имаат можност за првпат да играат на новиот терен.
Новото игралиште, покрај редовните активности, ќе биде достапно и за изнајмување и организирање натпревари, претставувајќи идеална локација за сите спортски ентузијасти.
Ве покануваме да ни се придружите на оваа прослава и да бидете дел од новата ера на фудбалска рекреација во Аеродром, известуваат од организацијата на настанот.
Вики Клинчарова