Денес гледаме дека победата на слободата, човековите права, демократијата и еднаквоста е загрозена во моментот кога поверувавме дека е целосно извојувана. Токму денес, во екот на новите крвопролевања, треба повеќе од кога било да се потсетиме на поуките од минатото, а 9 мај е еден од оние датуми – темелници на вистинските цивилизациски вредности, истакна претседателот на државата Стево Пендаровски во пораката по повод Денот на победата над фашизмот и Денот на Европа.
Додава дека Денот на победата над фашизмот е оддавање почит на милионите животи згаснати во борбата против окупаторот, ден кога, како што напиша во пораката – „со гордост се потсетуваме дека сме биле, сме и ќе останеме на вистинската страна на историјата“.
– Денот на Европа, кој ја слави идејата за траен мир и заедништво на континентот, е уште еден потсетник за клучната вредност на патот кон европското обединување на различностите. Само достоинствено, со почитување на правото на самоопределување може да зборуваме за обединета Европа. Победата над фашизмот е и победа за Европа, напиша шефот на државата во пораката.