Кога болеста ќе дојде ненајавено, посебно кај дете, кое првите три години од животот имало безгрижно детство и нормално се развивало, за да за кратко време ги изгуби сите функции, на семејството му преостанува вербата и борбата за живот.
Со тешка животна ситуација се бори фамилијата Тодоровски, откако пред две години на нивната ќерка Елеонора и била дијагностицирана леукодистрофија, ретка генетска болест. Од весело девојче, Елеонора денес е дете кое не може да оди, не зборува, отежнато голта и не може самостојно да се храни.
Семејството цели две години е низ болниците. Мајката Сања за ,,Фокус” раскажува дека станува збор за болест за која се уште нема лек, но со помош на напредни медицински третмани може да се запре прогресијата.
Во потрага по спас за своето дете, тие со сопствени средства и помош од роднини и пријатели заминале на клиника во Франција и имало подобрување во здравствената состојба. Сега сакаат да го продолжат лекувањето на клиниката ЛИВ во Турција, од каде добиле ветувачки прогнози од страна на лекари кои имале големо искуство со деца со генетски болести.
Сепак, за првите третмани им се потребни средства во висина од 17.400 евра, за кои мајката апелира до хуманите граѓани, доколку се во можност, да помогнат да се соберат.
-Отворена е можноста за подобрување на состојбата на Елеонора. За таа да може повторно да оди, да зборува, самостојно да се храни, потребна ни е помош од хуманите луѓе.
Цело семејство минуваме низ голгота. Нашето дете за кратко време ги изгуби сите функции. За да се спречи повторна прогресија на болеста, веруваме дека со третманите со матични клетки во Турција ќе се подобри состојбата. Таа беше прекрасно дете, сите се надеваме повторно да ужива во детството…
Лекарите имаат верба во напредокот, затоа и ја прифатија за лекување. И ние веруваме дека третманите значително ќе помогнат, во нив го гледаме излезот од состојбата – раскажува мајката.
Додава дека поради проблемите со хранењето на Елеонора и била поставена сонда. Моментално била на блендирана храна и пудинзи, на специјална протеинска храна и разни додатоци кои семејството само ги набавувало.
Покрај средствата од 17.400 евра, потребни за третманите на клиниката, потребни се средства и за превоз, за физикална терапија, како и за хотелско сместување.
-Според наша пресметка, ќе ни требаат најмалку 23.000 евра. Тешко е сето ова, нашето дете до триипол годишна возраст имаше нормално детство, се беше во ред. Изминативе две години ни се секојдневна борба, но не се откажуваме. Веруваме во напредок, во подобрување на состојбата, како и во хуманоста на народот – раскажа мајката на Елеонора.
Хуманите луѓе можат да и помогнат на Елеонора донирајќи на телефонските броеви:
Телеком: 143 138 и А1: 143 480
Отворена е и транскациска сметка на име Сања Тодоровска 210 501555959395
Телефонски број за повеќе информации 071 257 007
Вики Клинчарова