Соединетите Држави побараа од европските земји да предложат какви безбедносни гаранции можат да придонесат за Украина, изјавија четири европски извори. Изворите рекоа дека САД испратиле документ во кој се поставуваат прашања за можните придонеси од војниците, додека два извори велат дека документот бил испратен претходно оваа недела.
„Фајненшл тајмс“ најпрвин објави дека Вашингтон побарал од европските сојузници информации за оружјето, мировните сили и безбедносните аранжмани за Украина.
„Планот очигледно е да се види како европските сојузници гледаат на можна рамка за преговори што ќе стави крај на конфликтот и евентуален ангажман на Европа и САД“, рече европски дипломат запознаен со документот.
Документот вклучува шест прашања за сите членки на ЕУ, од кои едно се однесува конкретно само за членката што го прима документот, рече еден дипломат.
Украинскиот претседател Володимир Зеленски повика денеска на создавање на европска армија, велејќи дека континентот повеќе не може да се потпира на заштитата на САД и дека ќе има почит од Вашингтон само со силна војска.
„Американците посегнуваат по европските земји и прашуваат колку војници се подготвени да испратат“, рече трет дипломат. Американскиот Стејт департмент се уште не одговорил на барањето за коментар.