Обвинителката што го води случајот „Рекет“, Вилма Русковска вели дека нема сознанија за УСБ стикот кој го спомена попладнево лидерот на опозициската ВМРО-ДПМНЕ, Христијан Мицкоски за кој слушал дека има компромитирачки материјали за политичари од врвот.
„Има уште неколку стикови што се пратени на вештачење и за кои не е завршено вештачењето. Немам сознанија за таков стик за кој кажал Мицкоски. Ако тој има докази го повикувам да дојде во Обвинителството и да ги достави“, вели Русковска во изјава за Фокус.
Мицкоски на прес-конференција попладнево одговарајќи на новинарско прашање дали знае за некаков УСБ стик кој го поседувал Љупчо Палевски – Палчо кој неколку месеци е притворен во Белград, рече дека има слушнато, но се е на ниво на шпекулации.
„Исто така сум слушнал дека постојат таков вид на материјали. Се шпекулира во јавноста дека постои УСБ-стикче кое во обвинителсвото е заведено под број НСКРО74/17 и дека на тоа стикче има доста работи со кои треба да се позанимава македонската јавност, но сепак јас немам потврдени информации. Сето ова е на ниво на шпекулации навистина ако е точно е катастрофално. Тоа е уште еден пораз за Обвинителството и судството“, рече Мицкоски.
Според него, постои гласина дека тоа стикче е најдено во моментот кога се вршел претрес кај еден од осомничените во „Рекет“ и дека се наоѓа во Обвинителството.