Русија ќе претстави „документи“ кои ќе ја покажат, според нејзиното мислење, „реалната суштина“ на настаните во украинскиот град Буча, каде московските сили се обвинети за убиство на цивили, изјави рускиот министер за надворешни работи Сергеј Лавров.
– Преку нашиот постојан претставник во ОН денеска ќе организираме прес-конференција на која ќе бидат презентирани конкретни документи за вистинската природа на настаните, истакна Лавров.
Руското Министерство за надворешни работи соопшти дека конференцијата ќе се одржи денеска во седиштето на ОН во Њујорк во 21:30 часот по македонско време.
Кремљ категорично ги отфрли сите обвиненија, поврзани со откривање на голем број тела на цивили во Буча, во близина на украинскиот главен град Киев, по повлекувањето на руските сили. Лавров фотографиите на загинатите ги нарече „лажни“ и ги оцени како дел од кампањата за „пропаганда“ и „дезинформација“.
