Лидерите ширум Блискиот Исток и пошироко изразуваат сочувство откако иранскиот претседател Ебрахим Раиси и уште осум други загинаа во хеликоптерска несреќа.
Меѓу загинатите е и иранскиот министер за надворешни работи Хосеин Амир-Абдолахиан.
Индискиот премиер Нарендра Моди на мрежата Х напиша дека е шокиран од смртта на Раиси.
„Длабоко сум тажен и шокиран од трагичната смрт на д-р Сејед Ебрахим Раиси, претседател на Исламската Република Иран. Неговиот придонес во зајакнувањето на билатералните односи меѓу Индија и Иран секогаш ќе се памети. Моето искрено сочувство до неговото семејство и народот на Иран. Индија стои со Иран во ова време на тага“, напиша Моди.
Ирачкиот премиер Мохамад Шија Ал Судани изрази „искрено сочувство“ до иранскиот врховен лидер ајатолахот Али Хамнеи и неговата влада во објава на мрежата X.
„Ја изразуваме нашата солидарност со братскиот народ на Иран и нашите братски претставници во Исламската Република во оваа болна трагедија“.
Пакистанскиот премиер Шехбаз Шариф рече дека „Пакистан ќе прогласи ден на жалост, а знамето ќе биде спуштено на половина копје како знак на почит кон претседателот Раиси и неговите соработници и како знак на солидарност со братскиот Иран“.
Венецуелскиот претседател Николас Мадуро изјави дека е „потресен од страшната вест“ за смртта на претседателот на Исламската Република Иран.
„Го изразуваме нашето најдлабоко сочувство до врховниот лидер ајатолахот Али Хамнеи и бараме божествена утеха за таквата голема загуба“ порача Мадуро.
Претседателот на Обединетите Арапски Емирати, Мохамед бин Зајед Ал Нахјан, рече дека ОАЕ стојат во солидарност со Иран во овој тежок момент, изразувајќи искрено сочувство до семејствата на загинатите во несреќата.