Поранешниот генерален секретар на Владата, Драги Рашковски, од вчера не е повеќе во куќен притвор, бидејќи Апелација му ја укина мерката и му ја прифати гаранцијата од 192.000 евра.
Оваа одлука ја донел Советот на Апелацискиот суд Скопје, составен од судиите Тања Милева, претседател на советот, Ѓоко Ристов и Лирие Елези Ајрулау, членови на советот.
Во одлуката на скопска апелација се вели и дека се прифаќа понудената гаранција од страна на обвинетиот Рашковски, во вкупен износ од 192.980 евра, што се состои од ставање хипотека на недвижен имот.
Во одлуката на Апелацискиот суд се наведува дека обвинетиот по укинување на мерката притвор има обврска да се јавува секој работен прв понеделник во месецот во 10 часот, на овластено службено лице при Основен кривичен суд Скопје – Одделението за организиран криминал и корупција.
-Привремено одземање на патна или друга исправа за преминување на државната граница на име на обвинетиот Д. Р., односно забрана за нејзино издавање, стои одлуката на Апелациониот суд Скопје.
Исто така, во образложението на одлуката се вели дека мерките на претпазливост ќе траат додека постои потреба од тоа, а најдолго до правосилноста на пресудата, а судот по службена должност на секои два месеци преиспитува дали има потреба за траење на мерката на претпазливост.