Со разрешувањето на сите управни одбори од страна на Владата парализирана е работата на Управниот одбор на ФЗОМ, кој е надлежен орган за одлучување во втор степен по жалби за лекување во странство, обвинува актуелниот директор на Фондот за здравство Сашо Стефановски. Тој во писмото до министерот за здравство Арбен Таравари прашува кој ќе ја понесе одговорноста од ваквите одлуки со кои, вели дека директно се загрозува здравјето на граѓаните.
Писмото е одговор на изјава на Таравари дека до крајот на неделата ќе биде разрешен директорот на Фондот, Сашо Стефановски, бидејќи не одел на работа и го игнорирал Министерството за здравство.
Генералниот секретар на Владата, Драги Рашковски, потврди дека до вторник ќе бидат избрани нови управни одбори секаде, па така и во Фондот за здравствено осигурување. Тој порача директорот на ФОЗМ да не прави непотребна драма околу сето тоа, пишуваат од НоваТВ.
„До вторник ќе бидат назначени нови управни одбори, така ќе биде и во Фондот за здравство. Нека не драматизираат, ова е нормална процедура така што за неколку дена нема да се смени ништо“, изјавил Рашковски за НоваТВ.