Популарниот актер и музичар Раде Шербеџија ќе одржи ексклузивен концерт во Битола. Настанот ќе се случува на 19-ти март во 20 часот во големата сала на Центарот за култура.
Од таму информираат дека Шербеџија ќе биде на сцената со ,,Западни колодвор” и во живо ќе го изведе албумот ,,Не свртувај се сине”.
-Новиот студиски албум на легендарниот актер, поет и музичар е врвно музичко достигнување што ни доаѓа како подарок во живо за публиката која на 19 март ќе биде во Битола, а создаден е во време на короната, кога паузираше филмската индустрија.
Најавен со хитот „Ето пјесме“ кој за него го напиша Хусеин Хасанефендиќ од „Парни ваљак“, Шербеџија албумот го сними со екипа одлични музичари на крајот на 2020.
На албумот, Шербеџија го остава и својот авторски потпис, посветувајќи му ја песната „Шехерезада“ на познатиот словенечки театарски режисер Томаж Пандур, за која аранжманот го создаде нашиот Диран Тавитјан- соопштија од Центар за култура Битола.
Наскоро ќе бидат објавени детали за продажбата на билетите.
Вики Клинчарова