Работната група за проширување и за земјите кои преговараат за пристапување во ЕУ (COELA) денеска и утре ќе престојува во работна посета на Северна Македонија, информираат од Мисијата на ЕУ во Скопје.
Ова, како што се нагласува во соопштението, е прва работна посета на COELA на земјава, која е како резултат на отворањето на пристапните преговори на ЕУ со Северна Македонија во јули 2022 година.
Посетата вклучува средби со премиерот Димитар Ковачевски, вицепремиерот и главен преговарач Бојан Маричиќ, министерот за надворешни работи Бујар Османи и претставници на министерствата и другите институции вклучени во таканаречениот „Кластер 1“ од преговорите за пристапување во ЕУ („Основи“).
Како што информираат од Делегацијата на ЕУ во Скопје, COELA ќе се сретне и со претседателот на Собранието Талат Џафери и ќе присуствува на заедничката седница на Националниот совет за евроинтеграции, со која претседава пратеникот Александар Николоски, и на собраниската Комисија за европски прашања, со која претседава пратеникот Арбер Адеми, на 14 септември во Собрание.
Делегатите од COELA ќе разменат мислења и со претставници на граѓански организации.
COELA е тело на Советот на ЕУ, составено од дипломати од сите земји-членки на ЕУ, кое е задолжено за процесот на проширување и односите со земјите кандидати кои преговараат за нивно пристапување во ЕУ.
Со COELA претседава ротирачкото претседателство на Советот на ЕУ, а во втората поливина од 2022 година со телото претседава дипломат од Постојаната мисија на Чешката Република во ЕУ.