Рускиот претседател Владимир Путин денеска и нареди на армијата на земјата да го зголеми бројот на своите војници за 180.000 на вкупно 1,5 милиони, во време кога воената операција на Москва во Украина трае повеќе од две и пол години.
Указот на Путин, објавен на официјалната веб-страница на владата, ќе стапи на сила на 1 декември. Со него се определува вкупниот број на руски воен персонал на речиси 2,4 милиони, вклучително и 1,5 милиони војници, и ѝ наредува на владата да ги обезбеди потребните средства.
Претходното зголемување на бројот на руски војници се случи минатиот декември, кога со декретот на Путин вкупниот број на руски воен персонал беше околу 2,2 милиони, вклучувајќи 1,32 милиони војници. Најспособните руски сили спроведуваат офанзива во источна Украина, каде што постигнаа постепен, но постојан успех во последните неколку месеци, пишува Асошиетед прес.
Во јуни, Путин го процени бројот на војници вклучени во, како што Кремљ ја нарекува „специјална воена операција“ во Украина на речиси 700.000. Откако повикаа 300.000 резервисти пред украинската контраофанзива во есента 2022 година, руските власти се префрлија да ги пополнат редовите на војниците кои се борат во Украина со доброволци, привлечени од релативно високите плати.