Рускиот претседател Владимир Путин денеска изјави дека Русија годинава ќе го зголеми производството на беспилотни летала за речиси десет пати до 1,4 милиони.
„Вкупно околу 140.000 беспилотни летала од различни видови беа испорачани на вооружените сили во 2023 година. Оваа година се планира производството на беспилотни летала значително да се зголеми. Поточно, речиси десет пати“, рече тој на состанокот во Санкт Петербург за развој на производство на дронови.
Војната во Украина главно се води со артилерија и беспилотни летала долж илјада километри тешко утврден фронт каде што се борат стотици илјади војници.
И Русија и Украина купуваат беспилотни летала во странство, но го зголемија и сопственото производство на беспилотни летала за низа цели – од уништување складишта за артилерија и оружје до напад на енергетска инфраструктура и воени бродови.