Протерани 11 Албанци од депонијата во Струга за кои постои сомнеж дека се поврзани со неодамнешните пожари

Струшката полиција протера 11 државјани на Албанија, кои престојувале во импровизирани живеалишта кај депонијата во Струга, а постои и можност да се поврзани со пожарот, информираа од Секторот за внатрешни работи Охрид.

„На 25-ти овој месец, полициските службеници ги затекнаа единаесетте албански државјани на депонијата во Струга каде имале направено импровизирани живеалишта и од каде собирале пластичен отпад. Истиот ден, поради можна поврзаност со случениот пожар на депонијата, повикани се на разговор во полициската станица во Струга“, велат од полицијата.

Поради утврден нелегален престој и работа, надлежните им изрекле забрана за влез во Македонија во период од една година. Сите 11 лица, информираа, се пренесени до граничниот премин.