Венецуелскиот министер за надворешни работи Диосдадо Кабело објави дека властите уапсиле шест странски државјани, вклучително и член на елитната единица за специјални операции на американската морнарица SEAL, поради наводен заговор на ЦИА за дестабилизација на латиноамериканската земја.
Кабело тврди дека целта на ЦИА е да го убие претседателот Николас Мадуро, додека Стејт департментот ги отфрли овие наводи, пренесува Си-Ен-Ен.
На прес-конференција во саботата, Кабело го идентификуваше наводниот американски специјален агент како Вилијам Џозеф Кастанеда Гомез, велејќи дека тој е водач на операцијата. Министерот ги спомна и имињата на уште двајца приведени Американци – Дејвид Естреља и Арон Барет Логан.
Кабело додаде дека се уапсени и двајца шпански државјани, Хозе Марија Басо Валдовинос и Андрес Мартинез Адасме, како и Чехот Јан Дармовзал.
Венецуелските власти заплениле и 400 американски пушки поврзани со наводниот заговор, рече тој.
„ЦИА е на чело на оваа операција. Тоа воопшто не не изненадува, изјави Кабело на прес-конференцијата, тврдејќи дека е вклучен и шпанскиот Национален разузнавачки центар.
Тој изјави дека операцијата има „многу јасни цели да го убие претседателот Николас Мадуро и други високи венецуелски политичари, вклучително и потпретседателот и самиот Кабело“.
Стејт департментот ги отфрли тврдењата, но потврди дека припадник на американската војска бил уапсен во Венецуела и дека канцеларијата била „запознаена со непотврдените извештаи за приведени уште двајца американски државјани“ во таа земја.
„Сите тврдења за вмешаност на САД во заговорот за соборување на Мадуро се категорични лаги. САД продолжуваат да го поддржуваат демократското решение на политичката криза во Венецуела“, изјави портпаролот на Стејт департментот Метју Милер.
Неименуван извор од шпанското Министерство за надворешни работи изјави за Ројтерс дека бара повеќе информации од Венецуела.
„Шпанската амбасада испрати вербална нота до владата на Венецуела во која бара пристап до приведените граѓани со цел да се потврди нивниот идентитет и националност и да се знае за што точно се обвинети“, рече изворот.
Апсењата се случија два дена откако шпанскиот амбасадор во Каракас, Рамон Сантос, се сретна со министерот за надворешни работи на Венецуела, Иван Хил, во Каракас.
Тензиите меѓу двете земји настанаа откако шпанската министерка за одбрана Маргарита Роблес изјави дека во Венецуела владее диктатура, како и по средбата на венецуелскиот опозиционер Едмундо Гонзалес со шпанскиот премиер Педро Санчез во Мадрид.
Гонзалес ја напушти Венецуела претходно оваа недела, откако доби азил во Шпанија поради наводен политички прогон во оваа латиноамериканска земја.
По изборите одржани во јули, венецуелската опозиција ги објави резултатите од гласањето и истакна дека 75-годишниот Гонзалес извојувал убедлива победа.
Сепак, Изборната комисија на Венецуела го прогласи Николас Мадуро за победник, а тој ги отфрли меѓународните критики како десничарски заговор.
Досега, САД, Аргентина и Перу го признаа Гонзалес за новоизбран претседател.