Истражниот судија во Загреб денеска на разрешениот хрватски министер за просторно планирање, градежништво и државен имот, Дарко Хорват, му определи притвор од еден месец, поради сомневање дека незаконски распределил субвенции од повеќе милиони евра во 2018 година.
Претходно, премиерот Јосип Пленковиќ го разреши Хорват на негово барање, иако Пленковиќ порача дека му верува на Хорват.
Инаку, адвокатот кој го застапува Хорват изјави дека неговиот клиент на распитот се изјаснил за невин за злоупотреба на службената положба, додавајќи дека сите докази доаѓаат од друг случај каде второобвинета е Ана Мандац.
Полицијата, по наредба на обвинителството, заедно со Хорват ги истражува и вицепремиерот Борис Милошевиќ, државниот секретар на Министерството за регионален развој Велимир Зунац, директорката на управата за помошни области Катица Мишковиќ и други функционери.
Обвинителството се сомнева дека по налог на Хорват, неговата помошничка Мандац во табелата со оние лица на кои им се доделуваат грантови додала субјекти кои не ги исполнуваат критериумите.