Припадници на полициските Тигри, во кафеана во скопско Белимбегово ваделе оружје, според медиумите, кон бремени жени, започнале тепачка со сопругот на бремената, а во инцидентот има и последици и сето ова е пријавено и за сето има записник во полициска станица, обвини опозициската ВМРО-ДПМНЕ.
-Наместо веднаш да се бара каде исчезнал притворениот син на командантот Баци, којшто го вратиле дома од суд во притвор додека се пишувало решение за затворски притвор, наместо полицијата да реши барем едно од пукањата низ Скопје, МВР соопштува дека силите на Оливер Спасовски по кафани вадат пиштоли, а по медиумите имало и бремени жени и се почнуваат тепачки со последици! Ниедно решено пукање низ Скопје, редици криминални пресметки, киднапирање и убиство, бегства од притвори и затвори, а полицијата ако не е дел од акциите, тогаш вади пиштоли по кафеаните! Оливер Спасовски, доколку е доблесен, веднаш мора да одговори за бегството на синот на Командантот Баци од УЧК, и за однесувањето на Тигрите по кафеаните! Почитувани, каква полиција, таква држава! Наскоро ќе има расчистување и одговорност за сите случувања, изјави партискиот портпарол, Наум Стоилковски.
