Точката на пленарна седница во Собранието за разрешување на јавниот обвинител, Марко Зврлевски, почна да се разгледува на петти јули. И денеска се очекува пратениците од ВМРО-ДПМНЕ да си реплицираат сами на себе и да ги користат сите механизми кои им ги овозможува Деловникот, како процедурални забелешки и контрареплики. Пратениците од СДСМ најавија дека ќе се откажат од своето право на збор со цел да не ја пролонгираат седницата дополнително.
Пријавени за дискусија се 30 пратеници од опозициската ВМРО-ДПМНЕ. Сите имаат право на збор по 10 минути, а останатите имаат право на реплики и контрареплики. Десет координатори на пратенички групи од оваа партија имаат на располагање процедурални забелешки и барање за пауза од еден час по координатор. Од тие причини пленарната седница за Зврлевски може да се развлекува до бескрај, велат стручни служби од Собранието.
Од СДСМ најавија дека нема да одат на одмор додека не го разрешат Зврлевски, но се поизвесно е дека претседателот на Собранието, Талат Џафери, ќе ја стави во мирување седницата за пратениците да можат да го искористат својот годишен одмор.