411
Утрово околу седум часот по грчко време е пријавен пожар во шумската област Света Гора, во близина на манастирот Света Лавра на третиот крак од Халкидики, јавија грчките медиуми.
Од воздух и копно противпожарните сили на Грција го гаснат пожарот што рано утрово избувна во шумски предел на Света Гора, во поширокото подрачје на еден од манастирите.
Заменик-управителот на Света Гора, Аристос Касмироглу за грчката телевизија Скај рече дека пожарот е во непрооден дел во близина на манастирот, но станува збор за шумски предел и манастирот не е во опасност.
Тој рече дека се надева дека огнот брзо ќе биде ставени под контрола.
Во гаснењето учествуваат четири авиони и еден хеликоптер, како и 11 возила со 43 пожарникари и три пешадиски тима.